Daga MAHDI M. MUHAMMAD
Majiyoyin ’yan sanda da kafafen yaɗa labarai na ƙasar Colombia sun bayyana cewa ’yan bindigar da suka yi garkuwa da mahaifin ɗan ƙwallon Liverpool Luis Diaz na tsawon kwanaki 13 sun sako shi.
Jami’an rundunar ‘yan tawaye na ELN sun miƙa Luis Manuel Diaz ga Jami’an Majalisar Ɗinkin Duniya da jami’an cocin Katolika.
An sace shi ne a ranar 28 ga Oktoba a garinsu, Barrancas.
An kuma kama mahaifiyar ɗan wasan, amma an sako ta cikin ‘yan sa’o’i.
Kafofin yaɗa labaran cikin gida sun ce Mista Diaz na tafiya ne da helikwaftan soji zuwa birnin Valledupar, inda za a duba lafiyarsa kafin a mayar da shi ga iyalansa.
Har ila yau, sun ambato hukumomi na cewa yana cikin ƙoshin lafiya, ba tare da wata alamar cewa an muzanta shi ba.
A cewar jaridar El Tiempo, an yi ta murna a unguwar da su Diaz ke zaune, inda ‘yan uwa suka hau motocinsu domin su ratsa kan tituna suna murna.
Yawancinsu suna sanye da rigar ƙungiyar Liverpool mai lamba 23 da sunan Luis Díaz.
Satar da aka yi ya haifar da zulumi a Colombia, inda Luis Diaz, wanda ke cikin tawagar ƙasar Colombia, ya shahara matuƙa.
