Daga BELLO A. BABAJI
Ɗan wasan gaba na Super Eagles, Victor Osimhen ya shigar da ƙara akan ɗan jaridar Turkiyya da ya zarge shi da yi masa duka a wani wajen cin abinci mako biyu da suka gabata.
Abokin Osimhen na ƙud-da-ƙud kuma ma’aikacin gidan rediyo, Onokala Onyebuchi da ake kira da Buchi Laba ya bayyana hakan a shafin X, ranar Lahadi.
Ya ce Osimhen ya maka ɗan jaridar ne a kotu bisa zargin sa da yi masa duka.
Haka kuma ya ce za a fara shari’ar ne a ranar Talata.
Hakan na zuwa ne a lokacin da Bozduman ya zargi ɗan Nijeriyar da casa shi bayan kammala wasan da ƙungiyar Galatasaray ta yi 3-3 tsakaninta da Dynamo Kyiv a farkon watan nan.
Ɗan jarida Bozduman ya yi ikirarin cewa Osimhen cikin fushi ya kai masa naushi a lokacin da ya yi yunƙurin ɗaukar hoto tare da ɗan wasan a bayan filin da aka yi wasan.
Rahotonni sun yi zargin cewa Osimhen ya biya kuɗi don a ba shi ɗaukar inda lamarin ya faru saboda a goge ta a matsayin hujja.
Ɗan wasan mai shekaru 26 ya musanta zarge-zargen da ake masa inda ya bayyana su a matsayin ƙarairayi.
