Daga BELLO A. BABAJI
Ma’aikatar Hajji ta Saudiyya fitar da sababbin matakan kariya ga masu aikin hajji, inda ta yi kira a gare su da su kiyaye halin da ake ciki duba da tsananin zafi da ake fama da shi.
Hakan na zuwa ne a yayin da matakin zafi a ƙasar ya haura digiri 50 domin tabbatar da kammala aikin hajjin cikin lumana.
Akan haka ne hukumomin suka nemi mahajjatan da kada su fito daga masaukinsu daga ƙarfe 10:00 na safe zuwa 4:00 na yamma, lamarin da ya shafi hatta ziyara zuwa dutsen ‘Jabal Noor’ a lokutan tsananin zafi.
Ma’aikatar ta kuma ce, zirga-zirga daga Arafa zuwa Muzɗalifa, za a yi su ne kaɗai ta motocin da hukumomi suka ware domin kauce wa agajin gaggawa a sanadiyyar zafi.
Haka kuma mahajjatan za su yi Udhiya da Hadaya ne ta hanyoyin da aka amince su, inda nan ba da jimawa ba za a fitar da bayanai akan haka.
An kuma kirayi jami’an aikin hajji da ƴan jarida da su isar da saƙon sharuɗɗan ga mahajjata domin tabbatar da kiyaye su da bada kariya a gare su a yayin gudanar da harkokin ibadar.
