Tsohuwar Ministar Harkokin Jin-ƙai da Ci-gaban Jama’a, Sadiya Umar Farouq, ta roki Babbar Kotun Abuja da ta soke sammacin kame da aka bayar a kanta.
Farouq ta gabatar da bukatar ne bayan kotun ta bai wa Hukumar Yaki da Cin Hanci da Rashawa (EFCC) izinin gurfanar da ita tare da tsohon Babban Sakataren ma’aikatar, Bashir Alkali, da Sani Mohammed a ranar 16 ga Afrilu.
Rahotanni sun nuna cewa EFCC na zargin wadanda ake tuhumar da hannu a wasu batutuwan da suka shafi gudanar da kudaden gwamnati a lokacin da suke rike da mukaman gwamnati.
Lauyoyin Farouq sun bukaci kotun da ta soke sammacin kama ta, yayin da ake sa ran kotun za ta saurari bukatar tare da yanke hukuncin da ya dace bisa tanadin doka.
Lamarin na daga cikin shari’o’in da ke jan hankalin jama’a, musamman duba da matsayin wadanda ake tuhuma da kuma zarge-zargen da ake bincike a kai.
