Daga AISHA ASAS
Masana cututtukan fata sun bayyana cewa, ƙafa na daga cikin wuraren da ƙwayoyin cuta da fungus suka fi samun damar rayuwa saboda zufa da danshi da ke taruwa musamman tsakanin yatsu.
A cewarsu, ɗaya daga cikin kuskuren da mutane ke yi shi ne wanke ƙafa ba tare da busar da ita yadda ya kamata ba. Wannan danshin da ke saura tsakanin yatsu na zama muhalli mai kyau ga fungus da sauran kwayoyin cuta.
A cewar likitoci, ya kamata mutum ya ɗauki tsaftar ƙafa kamar yadda yake ɗaukar tsaftar fuska ko baki.
Sun bayyana cewa, kula da tsaftar ƙafa ya kamata ya zama wani ɓangare na rayuwar yau da kullum. A cewarsu, ana buƙatar a riƙa wanke ƙafa da ruwan dumi mai sauki tare da amfani da sabulu mai sauƙin ƙarfi domin kare fata daga bushewa.
Haka kuma sun jaddada muhimmancin tsaftace tsakanin yatsu sosai saboda wurin na daga cikin wuraren da danshi da kwayoyin cuta suka fi taruwa. Bayan wanke ƙafa kuma, likitoci sun ce wajibi ne a busar da ita gaba ɗaya kafin sanya safa ko takalmi, tare da canza safa kullum musamman bayan zufa.
Wata ƙwararriyar likitar fata ta bayyana cewa: “Mutane kan kashe kuɗaɗe wajen siyan mayuka na fuska amma su manta cewa ƙafa ma fata ce da ke buƙatar kulawa ta musamman.”
