Daga MAHDI MUSA MUHAMMAD
Kungiyar Masu Fasahar ƙirƙirar Shafukan Yanar Gizo ta ‘Bloggers da Vloggers, Content Creators Association in Nigeria’ (BAVCCA) ta yaba wa Darakta-Janar na Hukumar Tsaro ta Farin Kaya (DSS), Oluwatosin Ajayi, bisa kame shugabannin ƙungiyar ta’addanci ta Ansaru, wacce aka fi sani da Jama’atu Ansarul Muslimina fi-Biladis Sudan, ƙungiyar Al-ƙaeda ta Nijeriya, da kuma ƙungiyar ta’addanci ta Mahmudawa.
A cewar ƙungiyar, shugabannin ‘yan ta’addan su ne: Abubakar Abba, na ƙungiyar ta’addanci ta Mahmuda, a Wawa, ƙaramar hukumar Borgu ta jihar Neja; Mahmud Muhammad Usman, wanda ake yi wa laƙabi da Abu Bara’a — wanda ke kiran kansa Sarkin ‘yan ta’addar Ansaru — da kuma shugaban ma’aikatan fadarsa, Mahmud al-Nigeri, wanda ake yi wa laƙabi da Malam Mamuda.
Shugaban BAVCCA, Ikechukwu Chukwunyere, ya faza a Abuja cewa kama su ya nuna alamar hazaƙa da kuma ƙarfin dabarun ɗaukar matakai na sirri.
An yi nuni da cewa, hukumar ta DSS, a ƙaraashin jagorancin Ajayi, ta kai hare-hare ga cibiyoyin ‘yan ta’adda, musamman tare da kama shugabannin ƙungiyar ta’addancin Ansaru.
ƙungiyar ta ce, “Wannan aikin, wanda aka aiwatar da shi da cikakken tsari ba tare da harbin bindiga ba, ya kawar da wani babban jigon da ke dagula al’amuran dajin Kainji. Saurin da Abba ya yi zuwa Abuja domin yi masa tambayoyi ya nuna yadda hukumar DSS ke gudanar da ayyukanta da kuma jajircewarta wajen wargaza ababen more rayuwa na ta’addanci.
“Waɗannan mutane sun daɗe suna ci wa Nijeriya tuwo da ƙwarya saboda rawar da suke takawa wajen kitsa kai hare-hare da garkuwa da mutane, an gurfanar da su gaban kotu ta hanyar gudanar da ayyukan haɗin gwiwa da suka dace. Waɗannan nasarorin da aka samu ba wai kawai ingantattun damar bayanan sirri na DSS ba ne, har ma da dabarun hangen nesa na mai ba shugaban ƙasa shawara kan harkokin tsaro Nuhu Ribadu, wanda sake farfaɗo da tsarin tsaro na Nijeriya.
“Muna tare da muryoyi irin su Gwamnan Jihar Neja Mohammed Bago, wanda ya yaba da wannan kame a matsayin ‘babban nasara’ ga al’ummar ƙasa da kuma nuna jajircewar Shugaba Bola Tinubu na kawo ƙarshen rashin tsaro. ƙungiyar kare haƙƙin Musulmi (MURIC) ta kuma yaba wa jagorancin Ajayi da kuma jarumtaka na DSS waɗanda ba su yi waƙa ba – jami’an da ke aiki a cikin sirri, da kuma kare lafiyar al’ummominmu. Darakta, Farfesa Ishaƙ Akintola, ya kwatanta wannan ƙoƙarin a matsayin ‘babban ɓarna ga ta’addanci,’ ra’ayin da muke yi da gaske.
“A matsayinsu na masu ƙirƙira a yanar gizo, mambobin BAVCCA sun himmatu wajen yin amfani da dandaloli don ƙara ƙaimi ga nasarorin da aka samu da kuma sanya bege a tsakanin ‘yan Nijeriya, muna kira ga gwamnati da ta ci gaba da tallafa wa hukumar ta DSS ta hanyar ƙara kuɗaɗe da albarkatu, domin tabbatar da cewa waɗannan nasarorin sun zama ginshiƙin samar da zaman lafiya mai ɗorewa.
“Zuwa ga Oluwatosin Ajayi da jajirtattun jami’an DSS: sadaukarwar da ku ke yi ita ce ginshiƙin tsaron ƙasarmu. BAVCCA na gaishe ku a matsayin ku jarumai masu kula da makomar Nijeriya, kuma mun yi alƙawarin ci gaba da ba da labaran ku na jajircewa da tasiri.”
