Daga MAHDI MUSA MUHAMMAD
ƙungiyar Editocin Nijeriya (NGE) ta bayyana matuƙar damuwarta kan taɓarɓarewar tattalin arzikin ƙasa, da taɓarɓarewar tsaro, da ci gaba da taɓarɓarewar fannin ilimi, inda ta buƙaci gwamnatoci a dukkan matakai da su gaggauta magance ƙalubalen da ke gabansu domin kaucewa faɗawa cikin rikicin ƙasa.
A ci gaba da taronta na zaunannen kwamitin da ta gudanar a Owerri, jihar Imo, a ranar 15 ga watan Agusta, 2025, ƙungiyar ta bayyana muhimman ƙudurori kan muhimman batutuwan da suka shafi ƙasa, musamman yadda suka shafi kafafen yaɗa labarai da walwalar ‘yan Nijeriya.
A cikin wata sanarwar haɗin gwiwa da shugaban ƙungiyar na ƙasa, Eze Anaba da babban sakatare Onuoha Ukeh suka sanyawa hannu, editocin sun koka da halin ƙunci, hauhawar farashin kayayyaki, rashin aikin yi, da ƙaruwar fatara sakamakon hauhawar farashin canji da tsadar man fetur a Nijeriya.
Sun yi kira ga Gwamnatin Tarayya da ta ƙarfafa hanyoyin kare lafiyar jama’a domin daƙile illolin da ‘yan ƙasa ke fuskanta.
Yayin da take bayyana ci gaban da aka samu a yaƙin da ake yi na yaƙi da ta’addanci, ciki har da kame wasu manyan shugabannin ƙungiyoyin ‘yan ta’adda, ƙungiyar ta buƙaci gwamnati da ta ɗauki matakin da ya dace kan rashin tsaro ta hanyar ingantaccen tattara bayanan sirri, aikin ‘yan sanda, da haɗin gwiwa da masu ruwa da tsaki don kare rayuka da dukiyoyi.
Har ila yau, ta yi gargaɗin cewa masu aikata laifuka, masu tayar da ƙayar baya, masu garkuwa da mutane, da yawaitar ‘yan fashi suna gurgunta harkar noma kuma za su iya jawo matsalar abinci idan manoma ba su da kwarin gwiwar komawa gonakinsu.
Editocin sun yi tir da yanayin da ilimi ke ciki a ƙasar, inda suka ɗora laifin rashin kuɗi, gazawar samar da ababen more rayuwa, da kuma rashin jin daɗin malamai kan matsalolin da ake ci gaba da fuskanta a fannin.
Sun buƙaci gwamnatoci da su ɗauki matakin Majalisar ɗinkin Duniya na kashe aƙalla kashi 26 cikin 100 na kasafin kuɗi na shekara don samar da ilimi don kawo sauyi mai inganci.
Sanarwar ta kuma yi Allah wadai da ƙaruwar nuna kyama ga ƙungiyoyin yaɗa labarai da awararru daga hukumomin tsaro da masu zaman kansu, inda ta yi gargaɗin cewa duk wani yunƙuri na raunana kafafen yaɗa labarai zai gurgunta tsarin dimokuraɗiyya da kuma hana jama’a samun bayanai.
Ta yi gargaɗin cewa, “Masu rauni na kafofin watsa labarai na iya kasa ɗaukar labarai daga waɗanda ke kan madafan iko, iyakance damar samun bayanai, da haifar da rashin jituwa tsakanin jama’a da gaskiya.”
A yayin da suka yi kira da a tabbatar da gaskiya, haɗa kai, da sadaukar da kai ga jin daɗin ‘yan aasa daga kowane mataki na gwamnati, editocin sun yaba wa Gwamna Hope Uzodimma na Jihar Imo bisa karɓar baƙuncin taron tare da buƙace shi da ya ci gaba da haɗa kai da kafafen yaɗa labarai wajen gina ƙasa da inganta zaman lafiya da haɗin kai.
