Daga SANI AHMAD GIWA a Abuja
Babbar kotun birnin tarayya, Kuje, ta ɗage gurfanar da tsohon babban sakataren hukumar inshorar lafiya ta ƙasa, Farfesa Usman Yusuf zuwa ranar Litinin 3 ga watan Fabrairu, 2025.
Yusuf wanda hukumar yaƙi da masu yi wa tattalin arzikin ƙasa zagon ƙasa ta kama a ranar Laraba 29 ga watan Junairu, 2025, an gurfanar da shi a gaban mai shari’a Chinyere E. Nwecheonwu a ranar Alhamis domin gurfanar da shi a gaban kuliya bisa zargin zamba. Sai dai kotun ta ɗage ci gaba da sauraren ƙarar don ba da damar yin kwaskwarima ga tuhume-tuhumen.
Sanarwar da EFCC ta fitar a ranar Alhamis ta bayyana hakan.
A yayin ɗan takaitaccen zaman, lauyan masu ƙara, Isah Dokto Haruna, wanda ya gabatar da taƙaitaccen jawabi ga babban lauya O.I. Habeeb, SAN, ya nemi belin wanda ake ƙara, amma alƙali ya ƙi amincewa da buƙatar saboda dage ƙarar da aka yi.
Mai shari’a Nwecheonwu ya yanke hukuncin cewa, “Idan ba a yi shari’a a hukumance ba, beli a halin yanzu bai cika ba,” inji mai shari’a Nwecheonwu, inda ya umurci Yusuf ya ci gaba da kasancewa a hannun EFCC har sai ya gurfana a gaban kotu.
Za a ci gaba da shari’ar a ranar 3 ga Fabrairu, 2025, inda za a gurfanar da tsohon shugaban NHIS a hukumance.
