*Rikicin Hormuz na ci gaba da girgiza kasuwar mai ta duniya
*Iran na neman a janye takunkumi da kuɗaɗenta da aka daskarar
Iran ta yi wata sabuwar barazana mai tayar da hankali inda ta ce idan Amurka ta sake kai mata hari, yaƙin ba zai tsaya a yankin Gabas ta Tsakiya kawai ba, zai bazu zuwa wasu yankuna na duniya.
Barazanar ta fito ne bayan shugaban Amurka Donald Trump ya bayyana cewa ya kusa bayar da umarnin sake kai hare-haren bama-bamai kan Iran, amma ya dakatar da shawarar a minti na ƙarshe domin bai wa tattaunawar diflomasiyya damar ci gaba.
Trump ya shaida wa manema labarai a Fadar White House cewa saura awa guda kacal ya yanke shawarar sake fara yaƙin, kafin daga bisani ya dakata.
Wannan rikici dai ya samo asali ne daga yaƙin da aka dakatar da shi makonni shida da suka gabata bayan tsagaita wuta da aka cimma a ƙarshen watan Afrilu. Tun daga lokacin ake ci gaba da tattaunawar zaman lafiya, amma har yanzu ba a samu cikakkiyar matsaya ba.
Iran ta ce ta gabatar wa Amurka da sabon tayin sulhu a wannan makon, amma bayanan da ta fitar sun nuna tana nan kan tsofaffin buƙatunta da suka haɗa da ɗage mata takunkumin tattalin arziki, sakin kuɗaɗenta da aka daskarar a ƙasashen waje da kuma janyewar sojojin Amurka daga yankin.
Dakarun Revolutionary Guards na Iran sun bayyana cewa idan aka sake kai musu hari, “yaƙin yankin da aka yi alkawari zai wuce iyakokin yankin wannan karon.”
A gefe guda kuma, rikicin mashigin ruwan Strait of Hormuz ya ci gaba da girgiza kasuwar makamashi ta duniya. Iran ta daɗe tana takaita zirga-zirgar jiragen ruwa a mashigin tun bayan fara yaƙin tsakanin Amurka da Isra’ila a watan Fabrairu, lamarin da ya haddasa ɗaya daga cikin manyan rikice-rikicen samar da mai a tarihin duniya.
Sai dai a ranar Laraba wasu manyan tankokin mai biyu na ƙasar Chana ɗauke da ganga miliyan huɗu na mai suka tsallaka mashigin, alamar cewa Iran na sassauta takunkumin ga ƙasashen da take kallon abokan hulɗarta ne.
Rahotanni sun nuna cewa farashin ɗanyen mai na Brent ya ci gaba da tashi da sauka sakamakon rashin tabbas da ke tattare da kalaman Amurka da Iran. Duk da raguwar da aka samu a ranar Laraba, farashin na ci gaba da zama sama sosai idan aka kwatanta da farkon watan Mayu.
Duk da tsagaita wutar da aka samu, rikicin bai kau gaba ɗaya ba. Hare-haren jiragen ruwa marasa matuƙa da hare-haren makamai masu linzami na ci gaba da tayar da hankali a yankin, yayin da ƙasashen duniya ke ci gaba da fargabar cewa duk wani sabon kuskure zai iya sake jefa yankin cikin mummunan yaƙi mai faɗaɗa zuwa sauran sassan duniya.
