Daga MAHDI MUSA MUHAMMAD
Kungiyar Tuntuɓa ta Arewa (ACF) ta bayyana rashin jin daɗinta kan hare-haren da ke faruwa a jihar Filato ta arewacin Nijeriya, inda a kwanakin baya aka kashe mutane da dama, ciki har da ƙananan yara da mata.
A wata sanarwa da sakataren watsa labarai na ƙungiyar, Tukur Muhammad-Baba ya fitar, ƙungiyar ta yi kira ga gwamnatin tarayya da ta sanya dokar ta-ɓaci a yankunan da ke fama da hare-haren na ’yan bindiga.
“A bayyana yake mutanen jihar na cikin tsananin tashin hankali, wanda kuma ya zo a daidai lokacin da rayuwa ta yi tsada. Dole ne a kawo ƙarshen kashe-kashen nan, sannan dole a tabbatar an dawo da zaman lafiya a jihar,” inji ƙungiyar.
ƙungiyar ta kuma yi kira da a ƙara ƙaimi wajen tattara bayanan sirri, sannan a ƙara ƙarfafa jami’an tsaro wajen bibiya tare da kama masu laifi, “sannan su yi bincike domin a hukunta waɗanda aka samu da laifi.”
Muhammad-Baba ya yi kira ga gwamnatin tarayya da ta gaggauta ɗaukar matakin magance matsalar tsaro a yankin.
Ya ce: “Muna matuƙar baƙin ciki game da hare-haren ban tsoro da ban tsoro da gungun ‘yan ta’adda ke kaiwa al’ummomin da ba su da kariya a jihar Filato, muna kira ga Gwamnatin Tarayya da ta ayyana dokar ta-ɓaci a cikin yankuna masu rauni waɗanda ’yan fashi da makami suka raina da kuma ɓullo da dabarun faɗakarwa da gaggawa da kuma ɗaukar matakan tunkarar jama’a.”
Ta kuma yi kira ga gwamnatin tarayya da ta ƙara ƙaimi wajen tattara bayanan sirri, aiki da tura jami’an tsaro da suka dace domin gano musabbabin sabbin facace-faɗace, bincike, ganowa, kamawa da hukunta waɗanda suka kai harin.
Yayin da ta ke jajantawa al’ummar da abin ya shafa, gwamnati da jama’ar jihar, kungiyar ta yi addu’ar Allah ya jiƙan wacanda suka mutu da kuma samun sauki cikin gaggawa ga waɗanda suka jikkata.
Haka kuma ACF ta buƙaci a tabbatar da biyan diyya ga waɗanda suka rasa ’yan uwansu, sannan a tallafa wa waɗanda suka jikkata.
A ƙarshe ƙungiyar ta yi kira ga gwamnatin tarayya da ta jihohi su ƙarfafa malaman addini da masu riƙe da sarautun gargajiya da ƙungiyoyi masu zaman kansu da sauran masu ruwa da tsaki domin taimakawa wajen sulhunta ɓangarori.
Har ila yau, ƙungiyar Kiristoci ta CAN a jihohin Arewa 19 da Abuja, sun nuna matuƙar alhininsu tare da jajanta wa Gwamna Caleb Mutfwang da ɗaukacin al’ummar Jihar Filato bisa abin da ta kira “kashe-kashen rashin hankali” da aka yi wa ‘yan ƙasa da ba su ji ba ba su gani ba a ƙaramar Hukumar ɓokkos da ke jihar.
ƙungiyar ta bayyana matsayin ta ne cikin wata sanarwa da shugabanta Rebiran John Hayab ya fitar a ranar Lahadi a Kaduna.
A cikin irin wannan tofin Allah tsine, shugaban ƙungiyar AYCF, Alhaji Yerima Shettima ya ce: “Mu a AYCF muna jajantawa iyalan waɗanda abin ya shafa da kuma al’ummar da abin ya shafa da suka yi asarar da ba za a iya mantawa da su ba, kuma doke a yi la’akari da raɗaɗin da irin wannan tashin hankali ke haifarwa, kuma abin tunatarwa ne kan buƙatar da ake da ita ta samar da ingantaccen tsarin tsaro.
“Bugu da ƙari kuma, a cikin wannan bala’i, muna kira da a biya isassun diyya ga iyalan waɗanda abin ya shafa, asarar rayuka, dukiya, da rayuwa ba za a iya biyan cikakkiyar diyya ba, amma tallafin kuɗi yana da muhimmanci ga waɗanda suka tsira su sake gina rayuwarsu.
