Daga BELLO A. BABAJI a Abuja
Iyalan tsohon Shugaban Ƙasa, Marigayi Alhaji Shehu Usman Aliyu Shagari sun sanar da rasuwar matarsa da ta rage, wato Hajiya Saratu Shagari bayan shafe shekaru 89 a duniya.
A wata takarda da babban ɗan tsohon shugaban ƙasar kuma Sarkin Mafaran Shagari, Kyaftin Bala Shagari ya fitar, iyalan sun ce Hajiya Saratu ta rasu ne a jiya Litinin da misalin ƙarfe 3 na yamma bayan fama da wani dogon rashin lafiya.
Ya ce, ta rayu cikin mutunci, haƙuri da sadaukarwa acikin iyalanta, wanda hakan ya sa za a yi kewar ta.
Ya kuma ce, za a yi jana’izarta a yau Talata da zarar an kammala sallar Azahar a gidansu da ke Shagari a jihar Sakkwato kamar yadda addinin Musulunci ya tanada.
Marigayiyar ta rayu da ƴaƴa da dama, jikoki da tattaɓa kunne.
Shehu Shagari shi ne farkon shugaban mulkin farar hula a Nijeriya inda ya jagoranci ƙasar daga shekerar 1979 zuwa 1983 kafin aka hamɓarar da shi bayan juyin mulkin soji.
Ya rasu a watan Disambar 2018 bayan shafe shekaru casa’in da ɗoriya a duniya.
