Daga BELLO A. BABAJI a Abuja
Super Eagles ta Nijeriya ta rasa damar shiga gasar Kofin Duniya na 2026 da za a yi a ƙasashen Kanada, Amurka da Mexico.
Jaridar NewsPointNigeria ta ruwaito cewa hakan na zuwa ne bayan da ƙasar DR Kongo ta doke ta a zangon buga fenareti a jiya Lahadi a wasan ƙalubale da suka fafata.
An tashi wasan ne 1 da 1 bayan ƙarin lokaci na zango na biyu, lamarin da ya tilasta wa ƴan wasan buga fenareti, inda Kongo ta doke Nijeriya da ci 4 da 3 wanda ya ba ta damar buga wasan neman gurbi kai tsaye a gasar a watan Maris na shekara mai zuwa.
A kwanaki kaɗan da suak gabata ne Nijeriya ta lallasa Gabon da ci 4 da 1, wanda ya ba ta damar kai wa wannan zangon.
Yanzu Nijeriya za ta mayar da hankali a wasanta na gasar Kofin ƙasashen Afirka a watan Disamba, wanda za a yi a Moroko.
