Daga BELLO A. BABAJI a Abuja
Tsohon Sufeto-Janar na Rundunar ‘Yan Sanda, Suleiman Abba, ya fice daga jam’iyyar APC tare da komawa jam’iyyar adawa ta PDP.
Abba ya sanar da sauya sheƙarsa ne a wani taron siyasa da aka gudanar a Bamaina da ke Jihar Jigawa, inda tsohon gwamnan jihar, Sule Lamido, da shugabannin PDP suka tarbe shi tare da magoya bayansa.
Ya bayyana cewa, ya ɗauki matakin koma wa PDP ne domin neman kujerar Sanatan mazaɓar Jigawa ta Kudu maso Yamma a zaɓen shekarar 2027, yana mai cewa jam’iyyar ce yake ganin za ta ba shi damar wakiltar al’ummar yankin yadda ya dace.
Da yake jawabi, Sule Lamiɗo ya bayyana shigar Abba cikin PDP a matsayin wani babban ci-gaba ga jam’iyyar, yana mai cewa hakan zai ƙara mata ƙarfi yayin shirin tunkarar 2027.
