Rundunar ‘yan sandan Jihar Kano ta sanar a ranar Litinin cewa ta miƙa mutane 76 da aka kama suna ɗauke da tutocin Rasha ciki har da wani da ba ɗan ƙasar ba, zuwa hedkwatarsu da ke Abuja domin gudanar da bincike mai zurfi kan zarginsu da laifin tayar da tarzoma.
Kwamishinan ‘yan sandan Jihar Kano, Salman Garba, ne ya bayyana hakan a ranar Litinin yayin da yake bayar da bayanai kan mutanen da aka kama a lokacin zanga-zangar yunwa a faɗin ƙasar wadda ta rikiɗe zuwa tashin hankali a yankin Arewa.
Ya bayyana cewa bisa ga umarnin Sufeto Janar na ‘yan sanda, Kayode Adeolu Egbetokun, ga dukkan kwamandoji da rundunar Kano ta yi aiki tuƙuru da ƙwazo wajen magance tasirin tashin hankalin da ya faru, kuma hakan ya kai ga kama mutane 873 da kuma gano kayayyaki da dama.
Ya bayyana kamu da kuma miƙa mutane 76 da ake zargi da ɗauke da tutocin Rasha, ciki har da wani da ba ɗan ƙasa ba, zuwa hedkwatarsu da ke Abuja domin gudanar da bincike mai zurfi kan zarginsu da laifin tayar da hankali.
Kwamishinan ya kuma sanar da kamu da gurfanar da mutane 150 kan keta dokar hana fita da gwamnatin Jihar Kano ta sanya.
Bugu da ƙari, Garba ya ce an gurfanar da mutane 600 kan laifuka daban-daban, ciki har da tayar da hankali, rikici, sata, ɓarna, da kuma ƙona gidaje da mutane 41 kan manyan laifuka, ciki har da fashi da makami, sace-sace, sata motar, da sauransu.
Ya ce ‘yan sanda sun gano kayayyaki kamar bindigogi guda biyu na AK-47 da sauran kayayyaki masu yawa da ƴan daba suka sace daga ofishin Sakatariyar Gwamnatin Jihar Audu Bako, ofishin hukumar sadarwa ta Nijeriya (NCC), Kotun Ƙoli, Kano Printing Press, manyan shaguna, da sauransu.
