Shugaban jam’iyyar Social Democratic Party (SDP) na ƙasa, Alhaji Shehu Gabam, ya bayyana cewa dakatarwarsa daga shugabancin jam’iyyar ba gaskiya ba ne, yana mai bayyana rahoton a matsayin “ƙarya” da ya kamata a yi watsi da shi. Ya ce yana nan a matsayin shugaban jam’iyyar kuma babu wani taron hukumar gudanarwa da ya amince da dakatarwarsa.
A wata ganawa da manema labarai a ofishin jam’iyyar da ke Abuja, tare da mambobin kwamitin gudanarwar jam’iyyar (NWC), Gabam ya zargi wata sabuwar tafiyar haɗin gwiwa da ƙoƙarin tayar da rikici a cikin jam’iyyar, tare da haɗin wasu daga cikin shugabannin jam’iyyar. Ya bayyana cewa hukumar zaɓe ta ƙasa (INEC) ta ƙi amincewa da ƙoƙarin shirya wani taro na NWC da ba tare da sa hannunsa ba.
Gabam ya ce wasu mutane ne da suka gaza samun shugabancin jam’iyyar suka haɗa kai don haifar da ruɗani, suna ganin jam’iyyar SDP a matsayin cikas a hanyarsu.
Ya kuma buƙaci Shugaba Bola Ahmed Tinubu ya hana amfani da hukumomin tsaro wajen murƙushe jam’iyyu da ra’ayoyi masu saɓani, yana mai cewa hakan barazana ce ga dimukraɗiyya.
A ƙarshe, ya mayar da martani kan zargin almundahana da kuɗaɗe da ake masa, yana mai cewa duk mambobin kwamitin gudanarwa sun amfana da kuɗin jam’iyyar kuma an rubuta sunayensu a cikin bayanan asusun bankin jam’iyyar.
Ya ce yana shirye ya fuskanci bincike kan shugabancinsa, kuma ya jaddada cewa wannan rikici an jima ana shirin tayar da shi.
