Daga MAHDI MUSA MUHAMMAD
A ranar Juma’a ne kwamitin Majalisar Wakilai mai kula da bunƙasar ma’adanai ya yi Allah wadai da halin da wasu ‘yan ƙasashen ƙetare ke nunawa a fannin ma’adanai, musamman wasu kamfanoni biyu na ƙasar Chana waɗanda a cewarsa Gwamnatin Tarayya tana bin su bashin sama da Naira Biliyan 15 na harajin VAT.
Jonathan Gaza, shugaban kwamitin ne ya bayyana haka a Abuja a lokacin da Ma’aikatar Kula da Ma’adanai ta ƙasa ta yi wa manyan jami’an gudanarwa da sauran ma’aikatan ma’aikatar ta bayani.
Ko da yake bai bayyana sunayensu ba, Gaza ya bayyana cewa gano hakan ya fito fili ne a yayin wani bincike da majalisar ta gudanar.
Ya bayyana cewa, a lokacin da ‘yan majalisar suka yi arangama da su ‘yan ƙasar China sun ce “ba sa biyan kuɗin harajin VAT ga gwamnatin Nijeriya”.
Wannan, a cewarsa, abu ne mai ban tsoro, idan aka yi la’akari da asarar kuɗaɗen shiga da kuma ƙoƙarin da gwamnati mai ci ke yi na farfaɗo da fannin.
Sai dai ya yaba wa gwamnati mai ci bisa ci gaba da ƙoƙarin farfaɗo da fannin, musamman kuɗaɗen shiga da aka samu a shekarar 2024 zuwa Naira Biliyan 38 da sama da dala miliyan 800 na zuba jari kai tsaye daga ƙasashen waje.
A nasa ɓangaren, Ministan M’adanai, Dele Alake, ya ce shugaban ƙasa Bola Tinubu ya ba shi damar ci gaba da yin katsalandan a harkokin haƙar ma’adinai a jihohi daban-daban.
Ya koka da babban ƙalubalen da ma’aikatar ke fuskanta saboda gwamnatocin jihohi suna ba da umarni da daidaita ayyukan haƙar ma’adinai a jihohinsu.
Wannan mataki a cewar ministan ya saɓawa kundin tsarin mulkin gwamnatin tarayya na shekarar 1999 inda ayyukan haƙar ma’adanai ke cikin jerin dokoki na musamman don haka ya kamata gwamnatin tarayya ta tsara da kuma sarrafa ta.
Ya bayyana cewa ya yi ƙoƙari da dama don magance wannan matsala kamar ganawa da gwamnonin jihohi amma ba tare da la’akari da yadda har yanzu akwai rashin bin aa’ida ba.
“A cikin shekarun da suka gabata mun shaida wasu ƙananan ƙasashe suna ba da umarni da daidaita ayyukan haƙar ma’adinai kuma abin da ya fi tayar da hankali shi ne ƙaruwar a cikin ‘yan kwanakin nan,” inji Alake.
“Wannan yana aika saƙo mara kyau ga masu zuba jari saboda gwamnatocin jihohi ba su da ‘yancin dakatar da ayyukan haƙar ma’adinai ko rufe wuraren haƙar ma’adinai.
“Na sanar da shugaban ƙasa game da wannan matsala kuma ya ba ni damar ci gaba da taka tsantsan kan gwamnatocin jihohi tare da tabbatar da cikakken bin doka. Don haka a cikin kwanaki masu zuwa, makonni za ku ji ƙarin bayani kan wannan batu.”
