Gwamnatin Jihar Zamfara ta yi alƙawarin tallafa wa sabuwar Jami’ar Tarayya ta Kimiyyar Likitanci da Fasahar Lafiya da ke Tsafe jihar.
Hakan na ƙunse a cikin wata sanarwa da mai taimaka wa Gwamna Dauda Lawal kan harkokin yaɗa labarai, Sulaiman Idris, ya fitar a yau Talata a Gusau.
Idris ya ce, Gwamna Lawal ne ya bayyana wannan alkawari lokacin da ya karɓi shugaban jami’ar, Farfesa Ibrahim Yakasai, tare da tawagar sa a ranar Litinin.
Gwamnan ya ce gwamnatinsa ta ayyana dokar ta-baci a fannoni biyu — ilimi da lafiya domin nuna cikakken ƙudirinta na farfado da waɗannan ɓangarori a jihar.
“Ku tabbata cewa gwamnati na za ta ci gaba da ba da cikakken goyon baya ga jami’ar. Za mu kuma ci gaba da neman ƙarin tallafi,” inji Gwamna Lawal.
A nasa bangaren, Farfesa Yakasai ya yaba wa gwamnan bisa kokarinsa na farfaɗo da harkokin ilimi da lafiya a jihar.
