Daga SANI AHMAD GIWA a Abuja
Gwamnan Jihar Kebbi, Nasir Idris, ya bayyana cewa bayanan ƙarya (false intelligence) ne suka taka muhimmiyar rawa wajen harin kwanton ɓauna da ya yi sanadin mutuwar jami’an tsaro 13 a jihar.
Rahotanni sun nuna cewa lamarin ya faru ne a ƙaramar Hukumar Shanga, inda jami’an tsaro suka fuskanci harin bayan sun fita domin kai ɗauki sakamakon kiran gaggawa da aka yi musu.
Gwamnan ya bayyana hakan ne bayan ya kai ziyara yankin da lamarin ya faru, inda ya ce sojojin sun samu rahoton cewa wasu ‘yan bindiga na taruwa domin kai hari kan al’umma, wanda hakan ya sa suka ɗauki matakin gaggawa.
Sai dai ya ce bayanan da aka samu daga farko ba su kasance sahihai ba, domin maharan sun yi amfani da wannan dama wajen shirya kwanton ɓauna a kan hanyar da jami’an tsaron za su bi.
“An samu kiran gaggawa cewa ‘yan bindiga na shirin kai hari, amma abin takaici, bayanan ba daidai ba ne. A kan hanyarsu ta zuwa wurin ne aka yi musu kwanton ɓauna,” inji gwamnan.
A cewarsa, ‘yan bindigar sun kasance cikin shiri sosai, inda suka fake a wurare daban-daban tare da buɗe wuta kan jami’an tsaron, lamarin da ya jawo asarar rayuka masu yawa.
An tabbatar da cewa sojoji 11 da ɗan sanda guda ne suka rasa rayukansu a harin, yayin da wasu suka jikkata, wanda hakan ya ƙara dagula al’amuran tsaro a yankin.
Gwamna Idris ya bayyana harin a matsayin na rashin imani da kuma tashin hankali, yana mai cewa abin takaici ne yadda jami’an tsaro da ke sadaukar da rayukansu domin kare jama’a suka faɗa cikin wannan hali.
Ya ce ya ziyarci asibiti da ɗakin ajiye gawawwaki domin jajenta wa iyalan waɗanda suka rasu tare da ganin halin da waɗanda suka jikkata ke ciki.
Hakazalika, ya kai ziyara tare da Sarkin Yauri, Alhaji Zayyanu Abdullahi, domin duba ɓarnar da harin ya jawo da kuma jajenta wa al’ummar yankin.
Gwamnan ya tabbatar da cewa gwamnatin jihar za ta ɗauki nauyin kula da waɗanda suka jikkata, tare da bayar da tallafi ga iyalan waɗanda suka rasa rayukansu.
Ya kuma jaddada ƙudirin gwamnatinsa na ci gaba da yaƙi da matsalar tsaro da kuma daƙile ayyukan ‘yan bindiga da sauran miyagun laifuka a faɗin jihar.
“Ba za mu yi ƙasa a gwiwa ba wajen kare rayuka da dukiyoyin jama’a. Za mu ci gaba da ɗaukar duk matakan da suka dace domin kawo ƙarshen waɗannan hare-hare,” inji shi.
Gwamnan ya kuma yi addu’ar Allah ya jikkan waɗanda suka rasu, ya kuma ba wa iyalansu haƙurin jure wannan babban rashi.
A wani ɓangare, rahotanni sun nuna cewa irin wannan hari ba shi ne na farko ba, domin a watan Yuni na shekarar 2025, wasu sojoji 17 sun rasa rayukansu a wani hari makamancin wannan a Jihar Neja.
Haka kuma, a yankin Arewa maso Gabas, kungiyoyin Boko Haram da ISWAP na ci gaba da kai hare-hare kan sansanonin soji, lamarin da ke ƙara jefa ƙasar cikin ƙalubalen tsaro.
Masana na ganin cewa inganta tattara bayanan sirri da hadin gwiwa tsakanin jami’an tsaro da al’umma na daga cikin hanyoyin da za su taimaka wajen daƙile irin waɗannan hare-hare a nan gaba.
Lamarin ya sake jaddada muhimmancin sahihan bayanan sirri wajen gudanar da ayyukan tsaro da nuna irin haɗarin da ke tattare da yanke shawara bisa bayanan da ba a tantance su yadda ya kamata ba.
