Assalamu Alaikum wa Rahmatullahi wa Barakatuhu.
Ya ku matasan Nijeriya, ina rubuto muku wannan wasiƙa ne cikin yanayi na damuwa da kuma fata. Damuwa saboda yadda siyasa ta ci gaba da raba zukata, iyalai, al’ummomi da abokantaka. Fata kuma saboda ku ne ƙashin bayan yau da gobe, kuma ku ne za ku iya sauya alƙiblar siyasar ƙasarmu zuwa hanya mafi kyau.
A yau, abin takaici ne yadda wasu matasa ke ɗaukar siyasa a matsayin yaƙi maimakon fafatawar tunani. Bambancin jam’iyya ya zama dalilin gaba, zagi, cin mutunci da ma tashin hankali. Mutum zai ga matashi yana ƙin ɗan uwansa, makwabcinsa ko abokinsa saboda kawai suna goyon bayan jam’iyyu daban-daban. Wannan ba ita ce manufar siyasa ba.
Siyasa a asali hanya ce ta neman mafita ga matsalolin jama’a. Hanya ce ta tsara shugabanci, tattalin arziki, ilimi, lafiya da tsaro. Amma idan aka mayar da ita zuwa ɓangaranci, to manufarta ta asali ta ɓace.
Ya ku matasa, ku tuna cewa jam’iyya hanya ce kawai, ba addini ba ce. Jagora mutum ne, ba annabi ba ne. Duk wani ɗan siyasa yana iya yin kuskure, kuma duk wani ɗan siyasa yana iya yin abin kirki. Don haka kada ku kai matsayin da za ku daina ganin gaskiya saboda son wani ko ƙin wani.
Babban kuskuren da matasa da dama ke yi shi ne kare mutum maimakon kare ƙa’ida. Wasu suna yaba duk abin da shugabansu ya yi ko da a fili ba daidai ba ne. Wasu kuma suna ƙin duk wani abu mai kyau saboda kawai daga ɓangaren da ba sa goyon baya yake fitowa. Wannan hali yana kashe ci gaban dimokuraɗiyya.
Ku tambayi kanku: Shin muna goyon bayan mutum ne ko manufofi? Shin muna kare gaskiya ne ko jam’iyya? Shin muna neman ci gaban ƙasa ne ko nasarar wani ɗan siyasa?
Ku sani cewa bayan zaɓe, rayuwa tana ci gaba. Farashin abinci ba ya tambayar jam’iyyar da ka zaɓa. Rashin aikin yi ba ya bambance APC, PDP, LP, NNPP ko ADC. Matsalar tsaro tana shafar kowa. Rashin wutar lantarki yana shiga gidan kowane ɗan ƙasa. Saboda haka abin da ya kamata ya fi damunmu shi ne yadda za a samu mafita, ba yadda za mu ci gaba da rarrabuwa ba.
Wani abin da ke da matuƙar muhimmanci shi ne yadda ake amfani da kafafen sada zumunta. A yau, matasa da dama sun zama mayaƙan siyasa a Facebook, ɗ, TikTok da WhatsApp. Ana yaɗa jita-jita, ƙarya, hotunan bogi da bidiyoyin da aka sauya domin a ci mutuncin wasu ko a ɗaukaka wasu. Abin takaici, mutane da yawa suna tura irin waɗannan saƙonni ba tare da bincike ba.
Ku kasance masu tambayar gaskiyar bayanai kafin yaɗa su. Ku sani cewa ƙarya da yaudara ba za su taɓa zama hanya ta gina al’umma mai kyau ba.
Haka kuma, ku guji zama kayan aiki a hannun masu son tada fitina. Tarihin Nijeriya ya nuna mana cewa yawancin rikice-rikicen siyasa matasa ne ake amfani da su wajen aikata su. Bayan an gama amfani da su, su ne ke fuskantar sakamakon abin da suka aikata, yayin da masu hannu a sama ke cigaba da rayuwarsu cikin walwala.
Ku daraja rayuwarku, iliminku da makomarku fiye da duk wani ɗan siyasa. Kada ku bari wani ya sa ku zama makamin tashin hankali saboda buri ko amfani na kansa.
Matasan da suka fi amfani ga ƙasa ba lallai su ne masu yawan surutu a siyasa ba. Su ne masu kawo sabbin dabaru, masu gina kasuwanci, masu ƙirƙira, masu ilimi, masu bincike da masu neman mafita ga matsalolin al’umma. Siyasa mai kyau tana buƙatar irin waɗannan mutane.
Ina kira gare ku da ku zama masu shiga siyasa cikin hikima. Ku karanta manufofi. Ku binciki tarihin ‘yan takara. Ku miƙa tambayoyi. Ku nemi a yi bayanin yadda za a magance matsalolin al’umma. Ku daina ɗaukar siyasa a matsayin gasar magoya baya kawai.
Ku gina al’adar mutunta ra’ayin juna. Idan wani ya goyi bayan ɗan takarar da ba ku goyon baya, hakan ba ya nufin maƙiyinku ne. Bambancin ra’ayi yana daga cikin ginshiƙan dimokuraɗiyya. Al’umma mai lafiya ita ce wadda mutane ke iya saɓawa juna ba tare da sun zama maƙiya ba.
Ku tuna cewa Nijeriya ta fi kowace jam’iyya girma. Nijeriya ta fi kowane ɗan siyasa girma. Nijeriya ta fi kowace gwamnati girma. Abin da ya kamata ya haɗa mu shi ne makomar ƙasarmu, ba bambancin siyasa ba.
A ƙarshe, ina kira gare ku da ku zama ƙarni na matasan da za su sauya salon siyasar ƙasarmu daga siyasar zagi zuwa siyasar tunani, daga siyasar gaba zuwa siyasar haɗin kai, daga siyasar son rai zuwa siyasar gaskiya da riƙon amana.
Allah Ya ba mu shugabanni nagari, Ya ba mu hikimar zaɓen abin da ya fi alheri ga ƙasarmu, Ya kuma sa matasanmu su zama hasken da zai jagoranci Nijeriya zuwa makoma mai kyau.
Wassalamu Alaikum wa Rahmatullahi wa Barakatuhu.
Daga MAHDI MUSA MUHAMMAD. 07066778190.
