*An soke tafiyar shugaban Taiwan bayan hana jirginsa wucewa ta sararin wasu ƙasashen Afirka
Rikicin diflomasiyya tsakanin Chana da Taiwan ya ɗauki sabon salo bayan da wasu ƙasashen Afirka suka hana jirgin shugaban Taiwan Lai Ching-te wucewa ta sararinsu, lamarin da ya tilasta masa soke wata tafiya da ya shirya zuwa ƙasar Eswatini.
Chana ta bayyana jin daɗinta da wannan mataki, tana mai cewa ƙasashen sun yi daidai da manufar “Chana guda ɗaya”. Wannan shi ne karo na farko da aka tilasta shugaban Taiwan soke gaba ɗaya wata tafiya saboda hana masa izinin sararin samaniya.
Shugaban Taiwan ya shirya tafiya ne zuwa Eswatini, ɗaya daga cikin ƙasashe ƙalilan da ke da hulɗa ta diflomasiyya da Taiwan. Sai dai a daren da ya gabata kafin tafiyar, gwamnatin Taiwan ta sanar da cewa an dakatar da ziyarar saboda wasu ƙasashe uku, wato Seychelles, Mauritius da Madagascar, sun janye izinin da suka bayar na jirgin ya ratsa sararinsu.
Taiwan ta zargi Chana da amfani da matsin tattalin arziki domin tilasta waɗannan ƙasashe ɗaukar wannan mataki, amma wata mai magana da yawun ofishin kula da harkokin Taiwan na Chana ta musanta hakan, tana mai yabawa ƙasashen bisa bin manufar “Chana Guda ɗaya”.
A cikin wata sanarwa, ma’aikatar harkokin wajen Chana ta bayyana cewa babu wani shugaban Taiwan a duniya, tana mai cewa duk wanda ke amfani da wannan laƙabi yana saɓa wa tarihi kuma zai fuskanci tozarci.
Sai dai shugaban Taiwan Lai Ching-te ya mayar da martani da cewa ƙasarsa ba za ta bari a hana ta hulɗa da duniya ba, yana mai cewa duk wani matsin lamba daga Chana zai ƙara ƙarfafa musu gwiwa.
ƙasashen Madagascar da Seychelles sun bayyana cewa sun ɗauki wannan mataki ne saboda ba sa amincewa da Taiwan a matsayin ƙasa mai cin gashin kanta.
Duk da haka, gwamnatin Eswatini ta tabbatar da cewa wannan lamari bai sauya dangantakarta da Taiwan ba, tana mai cewa za ta ci gaba da bin manufofinta na hulɗa da ƙasashen duniya cikin ‘yanci.
A Amurka kuma, wasu ‘yan majalisa sun nuna damuwa, suna mai cewa wannan mataki na Chana ba diplomasiyya ba ne, illa wani nau’i na matsin tattalin arziki da ke nufin ware Taiwan daga duniya.
Hakan na zuwa ne bayan Chana ta ɓullo da wasu sabbin manufofi na jawo hankalin Taiwan, ciki har da sassauta shigo da wasu kayayyaki, bayan wata ganawa tsakanin shugabannin jam’iyyar adawa ta Taiwan da shugaban Chana Xi Jinping.
Jam’iyyar Kuomintang ta Taiwan ta buƙaci Chana da ta rage matsin lamba, tana mai cewa hakan ba zai taimaka wajen warware rikicin ba.
