Daga ABDULLAHI MUHAMMAD a Katsina
Muna aiwatar da sauye-sauye a fannin aikin gwamnati ne domin tsaftace tsarin gudanar da aiki, inganta ƙwarewa, da ƙara ingancin aiki a dukkan matakan gwamnati.” Gwamna Dikko Raɗɗa
Gwamnan jihar Katsina, Malam Dikko Umaru Raɗɗa ya bayyana haka a yayin da ya karɓi tawagar shugabannin gudanar da ƙananan Hukumomi, masu rajista, daraktoci, da shugabannin NULGE ƙarƙashin jagorancin shugaban hukumar kula da ayyukan ƙananan hukumomi, Alhaji Usman Aliyu Maska, a fadar gwamnatin jihar Katsina.
Gwamna Raɗɗa ya sake tabbatar da aniyarsa ta samar da ingantaccen aikin gwamnati a matakin jiha da ƙananan hukumomi, inda ya bayyana cewa gabatar da jarabawar ƙwarewa ga manyan sakatarori wani ɓangare ne na ƙoƙarin ƙarfafa tsarin cancanta, gaskiya da riƙon amana a aikin gwamnati.
Haka kuma, ya bayyana wasu shirye-shiryen inganta horo da ƙwarewa, ciki har da gyara da inganta kwalejin gudanarwa da ke Funtuwa, da kuma kafa cibiyoyin horar da malamai a lokacin hutu domin inganta ingancin ilimi a jihar.
Gwamnan ya yi gargaɗi kan rashin gaskiya a wajen gudanar da kuɗaɗen gwamnati, musamman karkatar da kuɗin ayyukan raya ƙasa, yana mai cewa irin wannan laifi zai jawo hukunci mai tsauri, har ma da korar aiki.
Ya kuma umurci a ƙara inganta tallafin kayan aiki ga masu gudanar da ƙananan hukumomi domin su iya gudanar da ayyukansu yadda ya kamata.
Tun da farko, shugaban hukumar kula da ayyukan ƙananan hukumomi, Usman Aliyu Maska, ya yaba da waɗannan sauye-sauye, yana mai cewa sun taimaka wajen inganta shugabanci da ayyukan gwamnati a matakin ƙasa.
Haka kuma, Shugaban NULGE, Nasiru Wada, ya jinjinawa manufofin gwamnatin da ke kula da ma’aikata, musamman tsarin fansho da aka kafa domin inganta rayuwar masu ritaya.
Shi ma shugaban ƙungiyar shugabannin gudanar da ƙananan hukumomi, Mukhtar Aminu Bakori, ya yaba da bai wa ƙananan hukumomi ‘yancin gudanar da kuɗaɗensu, sai dai ya roƙi gwamnati da ta ƙara tallafi domin sayen motocin aiki da kuma dawo da shirye-shiryen horo ga jami’an ƙananan hukumomi.
