Daga SANI AHMAD GIWA a Abuja
Garba Shehu, babban mataimaki na musamman ga Shugaban Ƙasa Muhammadu Buhari kan harkokin yaɗa labarai, ya ce biyan kuɗin fansa da iyalan waɗanda aka yi garkuwa da su ke yi na ƙara rura wutar ta’addanci a Nijeriya.
Garba Shehu wanda ya yi magana a gidan Talabijin na Channels TV a ranar Litinin ɗin da ta gabata, ya ce za a ci gaba da yin garkuwa da mutane har sai ‘yan Nijeriya sun daina biyan kuɗin fansa sannan su ƙyale jami’an tsaro su yi aikinsu.
Ya ce: “Duk waɗannan abubuwan da kuke faɗa game da masu garkuwa da mutanen da aka yi garkuwa da su, kuma shugaban ƙasa ko a saƙonsa na Sallah ya ambaci roƙon da yake yi wa ’yan ƙasa da su tona asirin su (masu aikata miyagun laifuka), ya shaida wa jami’an tsaro inda a wasu lokuta kuma kuna iya tausayawa ‘yan uwa a cikin wannan yanayi mai ban sha’awa.
“Babban abin da aka ba su na farko shi ne dawo da iyalansu kuma a shirye suke su biya, kuma sun biya kuma waɗannan kuɗaɗen, ko wani ya so ko bai so ba, za su ci gaba da rura wutar ta’addanci, dole ne mu yi koyi da abubuwan da suka faru sauran ƙasashen da idan kun biya ku ke rura wutar ta’addanci.
“Kuna ƙara rura wutar sace-sacen jama’a kuma hakan zai ci gaba da tafiya har sai mutane kawai su kawar da kai a shirye su bada damar jami’an tsaro.”
Shehu ya kuma yi magana kan harin da wasu da ake zargin ‘yan Boko Haram ne suka kai a gidan yarin Kuje.
Ya ce, “Ni ɗan Nijeriya ne, ina da ’yan uwa da ke rayuwa a cikin al’umma, ba na zuwa daga wani waje, ina ji kuma ban tava bada shawarar cewa babu wahala a ƙasar nan ba, ba a kowane wuri ko matsayi da ya nuna cewa babu laifi.”
