Daga SANI AHMAD GIWA a Abuja
Wani sabon yanayi na sauya sheƙa ya sake bayyana a Majalisar Wakilai ta Tarayya, inda wasu ‘yan majalisa suka sauya jam’iyyunsu a wani mataki da ake dangantawa da shirye-shiryen zaben 2027 mai zuwa. A zaman majalisar da aka koma bayan hutun Easter, Mataimakin Kakakin Majalisar, Benjamin Kalu, ya karanta wasiƙun sauya sheƙa daga ‘yan majalisa daban-daban, lamarin da ke nuna yadda harkokin siyasa ke kara sauyawa a Nijeriya.
Kalu ya yi watsi da ra’ayin cewa sauya sheƙar na nufin karkata kasar zuwa jam’iyya daya, yana mai cewa hakan alama ce ta ‘yancin dimokuradiyya. Ya bayyana cewa, masu fita daga jam’iyya mai rinjaye zuwa ƙanana da kuma daga ƙanana zuwa babba na nuna cewa babu wata jam’iyya da aka tauye.
Daga cikin fitattun sauye-sauyen da aka samu akwai na Hon. Thaddeus Attah mai wakiltar mazabar Eti-Osa a Jihar Legas, wanda ya fice daga Jam’iyyar Labour Party (LP) zuwa African Democratic Congress (ADC), inda ya danganta matakin nasa da rikicin shugabanci da ya dabaibaye jam’iyyarsa ta baya, wanda ya ce yana hana shi wakiltar al’ummarsa yadda ya kamata.
Jam’iyyar PDP ita ce ta fi fuskantar asara a wannan sabon sauya sheƙa, inda ta rasa ‘yan majalisa guda biyar. Abubakar Abdul daga Jihar Neja ya koma APC, Yakubu Noma daga Jihar Kebbi ya koma ADC, yayin da Ibrahim Mohammed shi ma daga Kebbi ya koma APC. A Jihar Osun kuma, ‘yan majalisa biyu—Mudashiru Alani da Adetunji Olusoji—sun fice daga PDP zuwa Jam’iyyar Accord.
Sai dai APC ma ba ta tsira ba, domin ta rasa ‘yan majalisa biyu; David Fuoh daga Jihar Taraba ya koma PDP, yayin da Bashir Zubair daga Jihar Kaduna ya koma ADC, lamarin da ke nuna cewa sauya sheƙar na faruwa ne a bangarori biyu.
Masana siyasa na ganin cewa irin wannan sauya sheƙa ba sabon abu ba ne a Nijeriya, musamman yayin da zabe ke karatowa. Daga cikin dalilan da ke haddasa hakan akwai rikice-rikicen cikin gida a jam’iyyu, bukatar sake tsayawa takara, neman goyon bayan manyan ‘yan siyasa, da kuma sauyin yanayin siyasar yankuna.
Yayin da ya rage kasa da shekaru biyu a gudanar da zaben 2027, ana sa ran irin wannan sauya sheƙa zai kara karfi a watanni masu zuwa, yayin da ‘yan siyasa ke kokarin daidaita matsayinsu kafin zaben fidda gwani. Haka kuma, karuwar karɓar ‘yan majalisa da jam’iyyu kamar ADC ke yi na nuni da yiwuwar fadada fagen siyasa fiye da yadda aka saba gani tsakanin APC da PDP.
A karshe, Majalisar ta dage zamanta zuwa ranar Laraba domin girmama marigayi dan majalisar Kano, Hon. Hassan Danjuma, wanda ya rasu a ranar 10 ga Afrilu, 2026 yana da shekaru 66.
