Daga ABUBAKAR A BOLARI a Gombe
A wani muhimmin mataki na inganta kiwon lafiyar al’umma, kamfanin Deɗa Medica, masu kera magungunan rage raɗaɗi na Boska, sun ba da tallafin kiwon lafiya kyauta ga mutum sama da 5,000 a Legas yayin shirin Pain-Free Day na su.
Tallafin kiwon lafiyar ya kunshi gwajin idanu, duba matsa lamba na jini, tausa na jiki, raba tabarau kyauta, da kuma magunguna masu muhimmanci.
Wannan shirin wanda ake gudanarwa a kowane wata a jihohi daban-daban, na da nufin inganta lafiyar al’umma tare da nuna godiya ga masu amfani da kayayyakinsu.
Da yake magana a taron, Uchendu Oɓuike, Manajan TMP na Boska Group, ya jaddada cewa shirin ya fi mayar da hankali kan ‘yan kasuwa a kasuwanni, waɗanda sau da yawa ba sa samun lokaci don kula da lafiyar su saboda tsananin aiki.
Shi ma Olawumi Oke wanda ya wakilce shi ya ce, “’yan kasuwa muhimmin ɓangare ne na al’ummarmu kuma suna goyon bayan kayayyakinmu.
“Wannan shirin wata hanya ce ta mayar musu da alheri. Ba kawai kula da idanu ba ne, har da lafiyar gaba daya. Manufarmu ita ce mu kai ga mutum 10,000 a wannan al’umma.”
Likitan idanu, Dakta Dickson Ezuwe, ya bayyana muhimmancin duba lafiyar idanu a kai a kai, yana mai haskaka cututtuka kamar su glaucoma, cataracts, da presbyopia, wadanda sau da yawa ba a gano su da wuri.
“Muna raba tabarau sama da 200 don taimakawa wadanda ke fama da wahalar karanta rubutu kanana saboda tsufa.
Haka kuma, muna duba cutar glaucoma kuma muna tura wadanda ke da matsananciyar lalura zuwa manyan asibitoci.
Yawancin mahalarta suna karɓar magunguna da jiyya kyauta don kamuwa da cututtuka na idanu,” inji shi.
Jakadiyar Boska, Deborah Olarewaju, ta jaddada yawaitar matsalolin kiwon lafiya kamar hauhawar jini tsakanin ‘yan kasuwa, wadanda yawanci ba a gano su da wuri.
“Ta wannan shirin, muna wayar da kan mutane game da kiwon lafiya kuma muna ƙarfafa su su tuntuɓi likitoci yayin da muke ba da magunguna kyauta,” inji Adepoju.
ɗaya daga cikin wadanda suka ci gajiyar shirin ta bayyana godiya kan wannan ƙoƙari, tana mai roƙon sauran kamfanoni su yi koyi da wannan yunƙuri.
“Suna yin aiki mai ban mamaki. Allah ya saka musu da alheri. Ya kamata sauran kamfanoni su yi koyi da wannan kokari don tallafa wa al’umma,” inji ta.
Shirin Pain-Free Day na ci gaba da fadada ayyukansa, yana ba da muhimman ayyukan kiwon lafiya ga al’ummomin da ba su samu isasshiyar kulawa ba a faɗin Nijeriya, ciki har da Kano, Gombe, Kaduna, Aba, Onitsha, Abuja, Sakkwato, Fatakwal, da Ilorin.