Daga SANI AHMAD GIWA a Abuja
Tsohon Mataimakin Shugaban Jam’iyyar APC na Arewa Maso Yamma, Malam Salihu Lukman, ya ce, hanyar da Kwankwaso ya ke bi ta kaiwa ga Fadar Shugaban Ƙasa “za ta ɗauke shi shekaru masu tarin yawa wurin tattaunawa da jama’a a sassan Nijeriya, wanda zai iya wuce lokacinsa na rayuwa ma”.
Lukman, wanda ya kasance baƙo a shirin siyasar gidan Talabijin na Channels a ranar Laraba, ya ce jam’iyya mai mulki za ta iya hanzarta aiwatar da muradin Kwankwaso ta hanyar buɗe masa ƙofar jam’iyyar domin ya dawo ya sake gina gada da aka ƙona a faɗin ƙasar nan.
Ya ce zarge-zargen cin hanci da rashawa da shugaban jam’iyyar APC na ƙasa, Abdullahi Ganduje ke yi a Kano yana da nasaba da siyasa, yana mai cewa hanyar siyasa kawai za ta magance shi.
Ya ce matsalolin da Ganduje ke fuskanta a Kano yana da nasaba da rigimarsa da Kwankwaso.
Ya ce rigingimun da aka daɗe tsakanin Ganduje da Kwankwaso “rikici ne da ba za a iya kauce masa ba wanda ya samo asali saboda jam’iyyar ba ta gudanar da shi yadda ya kamata ba” wanda ya sa Kwankwaso ya fice daga jam’iyyar.
“Dole ne mu tura Dr Abdullahi Ganduje ya sake tattaunawa a jiharsa saboda siyasa ce. Idan ba ku tunkare shi a siyasance, ba za ku taba kwace shi ba. Za ku iya maye gurbin Dr Abdullahi Ganduje kuma idan ba a magance qarfin da za a iya samun shugabanni su yi abin da ya dace a sansaninsu ba, za mu ci gaba da shiga cikin wannan lamarin,” inji shi.
Hukumar yaƙi da cin hanci da rashawa ta jihar ƙarƙashin kulawar gwamna Abba Yusuf na jam’iyyar NNPP na tuhumar Ganduje da wasu ‘yan uwansa bisa zargin cin hanci da rashawa kuma maganar tana gaban kotu. Wasu jiga-jigan jam’iyyar APC a gundumomi sun dakatar da Ganduje amma lamarin ya yi kaca-kaca da hukunce-hukuncen kotuna, inda APC ta yi watsi da waɗannan jiga-jigan tare da tabbatar da tsohon gwamnan Kano a matsayin shugaban jam’iyyar na kasa.
Lukman, tsohon Darakta Janar na ƙungiyar gwamnonin APC (PGF) na jam’iyyar APC mai mulki, ya ce, “Dole ne mu yarda cewa abubuwa ba su daidaita a cikin jam’iyyar APC, mu manta da batun Ganduje a Kano.
Gaskiyar ita ce, muna da matsalolin da ke buƙatar mu dawo don sake gina jam’iyyarmu.
“Burin Sanata Kwankwaso shine ya zama Shugaban Tarayyar Nijeriya. Inda ya ke a yau, zan iya amincewa da cewa zai zama tamkar wani tudu a gare shi ya zama Shugaban Tarayyar Nijeriya.
“Ya kamata mu tura Ganduje domin sake gyara komaɗar da aka samu tun da siyasa ce ta jawo, ta haka ne kawai za a gyara matsalar.
“Babban burin Kwankwaso shi ne ya zama shugaban ƙasa, a ina yanzu wannan buri nasa zai cika.
“Hakan zai ɗauke shi shekaru wurin tattaunawa da jama’a a ɓangarorin ƙasar wanda zai iya wuce lokacinsa.
“Za mu iya taimaka masa wurin ba shi dama ya shigo APC tare da sasanta shi da Ganduje a siyasance.
“Za a ɗauki tsawon shekaru ana yin gini da tattaunawa a faɗin ƙasar nan wanda zai iya wuce rayuwarsa idan kuma za mu yi gaggawar buɗe masa jam’iyyarmu ta yadda za mu sake sasanta dangantakarsa da Dr Ganduje da kuma duk faɗin ƙasar nan. Jiha, muna kuma sake tattaunawa tsakanin shugabanni da kawo sabbin sojoji, ‘yan Nijeriya ma na iya samun ƙarfin gwiwa a jam’iyyar.”