Daga AMINA YUSUF ALI
Wani hasashe da Bankin Duniya ya yi ya bayyana cewa, za a samu ƙarin waɗanda za su faɗa ƙangin talauci a cikin Nijeriya da ma wasu ƙasashen da suke maƙwabtaka da ita.
Wannan hasashe dai yana ƙunshe cikin wani rahoto da Bankin Duniya ya wallafa a jaridarsa ta ranar Juma’ar da ta gabata.
Bankin wanda yake a garin Washington ta Amurka ya ƙara da cewa, akwai yiwuwar samun karayar tattalin arziki gama-duniya bakiɗaya wanda zai iya jawo tsananta tsarin kuɗin a ƙasashen da suka cigaba wanda zai jawo wuyar kuɗi a kasuwanni da kuma ƙasashe masu tasowa kamar Nijeriya.
A dai cikin rahoton, Shugaban Bankin Duniya, David Malpass ya bayyana cewa, a halin yanzu Duniya tana fuskantar matsin tattalin arziki wanda rabonta da ta fuskanta tun lokacin yaƙin Duniya na biyu.
A cewar sa, tattalin arzikin Duniya yana jin jiki sannan kuma yana fuskantar rashin cigaba duk a lokaci guda. Ko da a ce za a samo hanyar magance matsin tattalin arzikin Duniya a cewar sa, to ba za iya magance karayar arzikin ƙasashen ba, sai dai idan wata hanya aka samu ta wadata al’ummar da abubuwan da suke buƙata.
Haka nan a cewar rahoton kutsen ƙasar Rasha a Yukiren ya taimaka matuƙa wajen kawo tsada da kuma ƙarancin abinci a Duniya bakiɗaya. Tasirin yaqin nasu kuwa ya shafi Nijeriya ne saboda ita da maƙwabtanta sun dogara sosai a kan kayayyaki da abincin da ake shigowa da shi daga ƙasashen ƙetare.