Daga CMG HAUSA
Yayin da gwamnatocin ƙasashen Sin da Amurka ke ƙara azamar daidaita tsakani, da shawo kan sabani, da kaucewa mummunar takara, masharhanta na ganin mafi yawan matsalolin da ƙasashen 2 ke fuskanta na da nasaba ne da yadda Amurka ke karya ƙa’idoji, ko ra’ayoyin da sassan biyu suka amincewa.
Daya daga muhimman batutuwa dake ci gaba da janyo hankalin duniya, don gane da takun sakar dake wakana tsakanin Sin da Amurka shi ne batun yankin Taiwan na ƙasar Sin, inda a wasu lokuta Amurka ta sha bayyana goyon bayan ta ga kasancewar yankin Taiwan ɓangare na ƙasar Sin da ba za a iya raba shi da babban yankin ƙasar ba, sai dai kuma a wasu lokuta, matakan zahiri da Amurka ke ɗauka na nuni da yadda take goyon bayan matakan aware, da ingiza goyon bayan masu burin ɓallewar yankin na Taiwan.
Idan ba a manta ba, a ranar 18 ga watan Maris da ya gabata, shugaban ƙasar Sin Xi Jinping, da takwaransa na Amurka Joe Biden, sun zanta ta wayar tarho, inda a tattaunawar tasu aka jiyo shugaba Biden na jaddada matsayin gwamnatinsa na goyon bayan manufar kasancewar yankin Taiwan ɓangare na kasar Sin. Har ma shugaban na Amurka ke cewa wannan manufa ce da ba za ta sauya ba.
Kazalika a lokacin, Mr. Biden da shugaba Xi sun umarci tawagogin ƙasashen su, da su gudanar da matakan bibiyar alƙawuran da sassan biyu suka yiwa juna, domin tabbatar da ba a sauka daga kan turbar da aka amincewa ba. To sai dai kuma abun tambaya a nan shi ne, shin Amurka ta martaba wannan alƙawari da ta yi game da batun Taiwan?
Ga duk mai bibiyar wannan batu, zai lura da yadda sau da dama Amurka ta riƙa canza matsaya kan wannan batu na Taiwan, ta hanyar tura wakilai yankin, da ƙulla hulɗoɗin ayyukan soji, da cinikayyar na’urorin ayyukan soji ba tare da neman izinin mahukuntan ƙasar Sin ba. Ko shakka babu, wannan mataki ne da ya saba matsayin Amurka na babbar ƙasa, da ya dace ta rika kare martabar ta, ta hanyar tsayawa kan alƙawuran da ta dauka ba tare da warwarewa ba.
Yin hakan shi ne zai tabbatar da darajar Amurka, na ƙasa mai ƙarfin fada a ji, tare da maido da dangantakar dake tsakanin ƙasashen biyu bisa turbar da ta dace, da samun ci gaba mai inganci, da inganta huldar ƙasashen biyu yadda ya kamata.
Fassarawa: Saminu Hassan