Daga MAHDI M. MUHAMMAD
Alamu masu ƙarfi na nuni da cewa jam’iyyar APC mai yiwuwa ta amince da mawallafin jaridar BluePrint, Mohammed Idris Malagi, a matsayin ɗan takararta na gwamna a zaɓen 2023 a jihar Neja.
Hakan ya biyo bayan halartar manyan jiga-jigan jam’iyyar APC a jihar da suka haɗa da Gwamnan Jihar Neja, Abubakar Sani Bello, a wajen ƙaddamar da ofishin yaƙin neman zaɓen Malagi a Minna a ƙarshen makon da ya gabata.
Waɗanda suka halarci taron sun haɗa da fitaccen jigon jam’iyyar APC a jihar daga shiyyar Sanatan Neja ta Kudu, Abubakar Magaji; wani Kawun Gwamnan Jihar, Sani Basket; tsohon shugaban ƙasa Janar Abdulsalami Abubakar, Yakubu Abdulsalami, da dai sauransu.
Masu lura da al’amuran siyasa a jihar na ganin cewa kasancewar waɗannan jiga-jigan ’yan siyasa musamman masu ɗimbin magoya baya a cikin jam’iyyar da al’ummominsu daban-daban, Malagi zai iya komawa gida da tikitin takarar gwamna na jam’iyyar APC.
Magaji wanda kuma babban dattijon jam’iyyar ne a jihar a takaice a jawabinsa a wajen bikin, ya yaba da halartar jiga-jigan jam’iyyar a jihar a wajen bikin kafin ya bayyana wanda ya nemi tsayawa takarar a matsayin wanda ya cigaba tafiyar.
Ya kuma nuna jin daɗinsa kan yadda ƙungiyar kamfen na Malagi ta gudanar da ayyukanta gaba ɗaya kafin ya nemi al’ummar jihar da su ba shi goyon baya tare da ba shi muƙamin a lokacin zaɓen fidda gwani da za a yi domin cigaban jam’iyya da jihar.
Tun da farko dai ɗan takarar ya sha alwashin cewa ba zai yi ƙasa a gwiwa ba wajen ƙulle-ƙullen da abokan hamayyarsa na siyasa ke yi wa mutanensa, yana mai cewa ba zai shagala da waɗannan mutane ba.
Ɗan takarar ya kuma naɗa Abdulmalik Muye a matsayin Daraktan kuɗi da gudanarwa naƙungiyar yaƙin neman zaɓen.