“Ba jikin mace kawai motsa jiki ke taimaka wa ba, har da ƙwaƙwalwa da kula da miji”
Daga ABUBAKAR M TAHEER
Mai karatu wannan tattaunawa ce da wakilin Manhaja ya yi da ƙwararriyar mai sana’ar koyar da motsa jiki, wanda ake kira da Yoga ga mata, wanda ta ke karantar da mata daga ƙasashen daban-daban na duniya. A cikin tattaunawar, ta kawo tarihinta da ma abinda ya ja hankalinta har ta fara wannan sana’ar wanda yanzu haka ta ke da kamfaninta mai suna Rhythm N Flow Limited. A sha karatu lafiya.
MANHAJA: Za mu so ki gabatar mana da kanki ga masu karatu?
FATIMA: Assalamu alaikum. Sunana Fatima Umar Shehu, wanda ni haifaffiyar garin Maiduguri ce. A Maiduguri na taso, sai dai kasancewar mahaifina Sojan sama ne, sai ya zama muna canja garuruwa, mun zauna Makurdi har zuwa Legas. A qarshe sai mahaifina ya yi ritaya a 1978, ya dawo Kano da zama.
A nan Kano bayan kammala aji biyar, zan je shida, sai ya zama aka maida ni Airforce firamare zuwa aji biyu. Daga nan na tafi FGGC da ke Bakori, Jihar Katsina. Nan na yi ƙaramar sakandare, na kuma sake dawo wa Kano na kammala. Na samu ‘admission’ a jami’ar Maiduguri, na karanci Tattalin Arziki, wato Bsc.Economic.
Bayan kammala karatu, na samu damar yin aure a shekarar 1994, inda muka koma Legas da zama. Shekaru biyu da aurenmu, sai aka yi wa mijina ‘transfer’ muka koma Fatakwal.
A can Falakwal a kamfanin da maigidana yake anan na samu damar shiga wata ƙungiyar agaji ta mata. Da haka sai ya zama idona ya buɗe kan tallafa wa mata da yara.
Haka kuma na samu damar karantar ‘Physical Fitness’, wato lafiyar jiki kenan. Haka kuma na je na sake samun damar yin kwasa-kwasan lafiyar ƙwaƙwalwa, wato ‘Mental Health Facilitating’, a turance. Sakamakon yin maganganun na hikima da mutanen dake fama da wannan matsalar.
Yaushe ki ka fara harkar motsa jiki?
To, gaskiya abinda ya faru da yake na yi fama da rashin lafiya wadda kusan kullum Ina kan maganin ciwon baya, ƙafa, gwiwa da ƙiba, to da wannan na yi yunƙuri, na buɗe ‘studio’ ɗina lokacin da muka tafi Ƙasar Burnai, a Darussalam, a shekarar 2015. Bayan dawo wa ta Nijeriya, sai na buɗe ‘studio’ a Legas cikin shekarar 2017. Inda nake koyar da yadda ake motsa jiki musamman Yoga da ma sauran abubuwa na samun lafiya da jin daɗi.
A shekarar 2019 bayan ɓullar cutar Korona, sai ya zama babu damar haɗuwa, a yi ‘training’ a ‘studio’ wannan tasa na buɗe ‘online class’, wanda kuma ya ma fi min sauƙi wajen koyarwa. Babu buƙatar sai na je wani wuri.
Sannan kuma sai ya zama hakan ya zama wata dama gare ni ta hanyar faɗaɗa wannan kasuwanci da na ke yi, kaga a baya iya Jihar Iko kawai ya tsaya, a yanzu kuma ta hanyar ‘online’ duk duniya Ina da ɗalibai. Ina da ɗalibai a Ƙasar Amurka, Saudiya, Netherland, Indiya, UK da sauran su.
A yanzu haka Ina koyar da mutane a lokuta daban-daban, wasu da safe ƙarfe 6:15, wasu 8:00 har da ajin da ake koyarwa da dare. Wanda kuma za ka ga irin nuna gamsuwa da jin daɗi da su ɗaliban suke, don wasu ɗaliban sun sha faɗa min cewa, mazajensu sukan yawan tambayarsu suna ganin canji duk lokacin da suka dawo daga ‘training’ wanda zai saka mace walwala da farin ciki.
Wani abu da koyar da motsa jiki ga mata da maza ke yi shine, a lokacin da na je Ƙasar Burnai, sai na ga su ma suna da ƙyanƙyamin a ce maza ne suke koya musu ‘training’, musamman na Yoga ɗin nan inda a can an ware ‘studio’ na musamman domin mata. Za ka ga mata suna zuwa suna kuma nuna gamsuwa da irin yadda suke ji a jikinsu. Ta hanyar motsa jiki ne jiki zai ƙone ƙiba da ‘Calories’ ɗin da jikin mace baya da buƙata.
Da yake jikin mace ya kan canja bayan haihuwa, wannan ta sa idan tana motsa jiki zai taimaka mata jikin bai saki sosai ba.
Menene abinda ki ka fi koyarwa a ajinki na Rhythm N Flow?
To, ahamdulillah. Kusan zan iya cewa, dama ni ƙwararriya ce kan Yoga, to kaga Ina koyar da yadda ake yin shi Yoga ɗin. Haka kuma mutane dake buƙatar tausa, rage nauyi, samun farin ciki da kwanciyar hankali, muna taimaka musu. Haka kuma muna ba wa mutane shawarwari kan yadda za su rabu ba tare da shiga damuwa ba.
Mu koma ɓangaren iyali. Kina da yara?
Ina da yara maza guda biyu, ɗaya zai cika shekara 26 kwanan nan.
A wannan tafiya da ki ka ɗauka, ko an ci karo da ‘yan ƙalubale?
To, a gaskiya ƙalubale kan ba za a ce babu ba, saboda ita rayuwa ma kaf cike ta ke da ƙalubale. Babban wanda na fuskanta shine, na rashin lafiya da na fuskanta tin Ina ƙarama, matsalar su ciwon baya, ƙafa da kuma ƙiba. Amma da na dage wajen motsa jiki, gaskiya na samu lafiya sosai, hakan na nufin nisanta daga shan magani.
Haka kuma akwai rasuwar mahaifiyina, wadda ta tada min hankali. Ya rasu sakamakon ciwon daji, wato ‘Cancer’.
To, ta ɓangaren nasarori waɗanne iri aka samu?
Nasarori kam sai dai a gode wa Allah, gaskiya na samu nasarori akan harkar motsa jiki. Na yi sanayya da mutane da yawa. Haka kuma na samu nasarori, kama daga shiga ƙungiyoyin tallafa wa al’umma na cikin gida Nijeriya da ma duniya bakiɗaya. Haka kuma ta vangaren harkar motsa jiki, an samu rufin asiri ba ɗan kaɗan ba, to babu abinda zance sai godiya ga Allah.
Wane kiira ki ke da shi ga shuwagabanni kan muhimmancin motsa jiki?
To, alhamdulillah. Gaskiya ya kamata shugabanni su rinƙa ware wuri na musamman wanda zai zama mata suna zuwa motsa jikinsu, domin kare jikinsu daga kamuwa da cutuka.
Haka kuma da yake kusan kowane gun motsa jiki za a ga yawanci maza ne, wannan kaga buƙatar a samar da na mata ya taso, kuma tun a yarinta za ka ga maza suna da damar zuwa waje su yi tsalle-tsallensu, wanda mata ba su da wannan damar.
Kiran da ki ke da shi ga ‘yan’uwanki mata kan motsa jiki.
To, kirana a gaskiya shine, mace ta sani, shi motsa jiki yana da tarin alfanu tun daga lafiya gangar jiki har ya zuwa lafiyar ƙwaƙwalwa wajen yawaita tunani mai kyau, wanda shine mutum.
Zai ba wa mace damar yin abinda ya danganci mijinta na kulawa da nuna ƙauna, haka zai rage wa mace shiga matsananciyar damuwa wanda har wasu sukan kashe kansu.
Idan mace ta samu dama ta rinƙa ‘joining class’ na ‘online’, ko kuma ta rinqa saka kayanta, tana fita gun da ake motsa jiki, tana yin abinta, domin samun lafiya.
Bari na taɓo zancen da ki ka yi na ƙarshe, wato mata masu kashe kansu ta sanadiyyar damuwa. Da farko, za mu so mu ji wacce irin damuwa ce ke kai mace ga yunƙurin ɗaukar ranta da kanta?
Za mu ci gaba a mako mai zuwa.